Aa gaya samay
firr khud ki sudh lene ka
Rishton ki uljhi dor ko tumhare gireban se nikalne ka
Beete waqt ki yaadon ko sametne ka
Kuch tasviron ko man ki sandook mein chupane ka
Kuch aur ko zahan ki gehraiyon mein dafnane ka
Dhundli ho gayi apni parchai ko fir aaine mein saamne lane ka Naye darwazon ko dastak dene ka
Nayi raahon pe badh chalne ka
Shabd alfaz nazuk komal
Shabd jinhone di thi aaghaz ek naye rishte ko
Naya naya sehma sa.....
Achraj se jhankta woh likhe hue shabdon ko
Har alfaz pe kabhi muskurata Kabhi thora sharmata
Samay ke sath bebak hote shabd Ek dusre ke wajood mein taakte shabd
Ek dusre ke wajood ko banate shabd
Kabhi roothe kabhi manate shabd
Kabhi ithlate kabhi sakuchate shabd
Pyar jatate naaraz hote shabd Aajkal samay ke dhaar pe tezz hoke Nashtar se shabd
Astitva ke daaman ko chalni karte shabd
Gehrayi tak chubh kar Nasoor banate shabd
Zahan ko jakhjorte shabd
Ab woh kehte hain Bhul jao shabd hi toh hai
Ab kaise koi samjhaye unhe
Jis rishte ki pehchan the shabd Usko maiyat tak le gaye hain ye shabd
